Platforma e njohur e mediave sociale dhe një ndër platformat me një numër të lartë përdoruesish, Instagram, është bllokuar në Turqi, tha të premten Autoriteti i Teknologjive të Informacionit dhe Komunikimit të vendit (BTK), pa dhënë asnjë arsye ose të dhëna për sa kohë do të jetë në fuqi ky bllokim.
Në faqen e BTK-së thuhet: “Instagram.com është bllokuar me vendim të Autoritetit të Teknologjive të Informacionit dhe Komunikimit datë 02/08/2024 dhe me numër 490.05.01.2024.-608983”.
Ndalimi erdhi pasi drejtori i komunikimit i presidencës turke, Fahrettin Altun, akuzoi të mërkurën Instagram-in, i cili është në pronësi të Metës, për censurim të përmbajtjes në lidhje me vrasjen e liderit të Hamasit, Ismail Haniyeh në Iran, duke e quajtur atë “martir”.
“Kjo është censurë, pastër dhe thjesht”, tha Altun, drejtor i komunikimit në Presidencën turke me anë të një postimi në platformën “X”, teksa shtonte se “Instagrami” nuk kishte përmendur ndonjë shkelje të politikave për veprimin e tij.
Megjithatë, nuk është ende e sigurt nëse platforma e Instagram-it është bllokuar për heqje të përmbajtjes për vdekjen e Haniyeh.
Turqia ka miratuar ligje dhe rregullore që i japin qeverisë kontroll më të madh në platformat dixhitale.
Turqia ka bllokuar më parë shumë platforma të mediave sociale, duke përfshirë YouTube, Threads, EksiSozluk, Wikipedia, Twitter dhe TikTok. Ajo gjithashtu ka vendosur ndalime të mediave sociale dhe transmetimit pas katastrofave, sulmeve terroriste dhe trazirave sociale.
Përdoruesit në Turqi nuk mund të hyjnë në Instagram përmes ueb-it dhe aplikacioneve celulare që kur ndalimi u vendos të premten në mëngjes. Qasja është ende e mundur përmes shërbimeve VPN.
