Hamasi tha në një deklaratë se lideri i saj Ismail Haniyeh u vra në rezidencën e tij në Teheran në një bastisje nga Izraeli. Grupi palestinez që kontrollon Gazën tha se Haniyeh “u vra në një sulm të pabesë sionist”.
Izraeli ende nuk është përgjigjur apo lëshuar një deklaratë.
Grupi tha se ai kishte marrë pjesë në ceremoninë e inaugurimit të presidentit të ri iranian Masoud Pezeshkian të martën.
“Lëvizja e Rezistencës Islamike Hamas vajton për popullin tonë të madh palestinez, për kombin arab dhe islamik dhe për të gjithë njerëzit e lirë të botës”, shtoi ajo.
Shumica e liderëve të Hamasit mbajnë një profil të ulët publik, ndërsa të tjerë kanë kaluar pjesën më të madhe të jetës së tyre duke iu shmangur tentativave për vrasje nga Izraeli.
Kujtojmë se pak kohë më parë, Ismail Haniyeh mësoi edhe për vrasjen e tre djemve të tij. Haniyeh e mori lajmin për vdekjen teksa vizitonte palestinezët e plagosur, të cilët u transportuan në një spital në Doha. Një telefonatë ndërpreu vizitën e tij në spital, ku mori dhe lajmin e hidhur për vdekjen e tre djemve.
Ai ruajti qetësinë dhe u tregua gjakftohtë, duke thënë: Është vullnet i Zotit.
