Aktori i njohur Tom Cruise, i cili aktualisht po xhiron “Mission: Impossible – Dead Reckoning Part Two” në Evropë, u emërua Kalorës i Legjionit të Nderit nga ministrja e kulturës e Francës Rachida Dati në Paris, shkruan Variety.
Disa orë para fillimit të ceremonisë së hapjes për Lojërat Olimpike, Cruise mori një nga dekoratat më prestigjioze të Francës, duke ndjekur gjurmët e artistëve, aktorëve dhe kineastëve të njohur si Robert Redford, Martin Scorsese dhe Clint Eastwood, të cilët janë gjithashtu pjesë e Legjionit të Nderit.
Dati, e emëruar ministre e kulturës në janar nga presidenti i Francës Emmanuel Macron, postoi një foto të saj duke pozuar me Cruise me krenari me medaljen e tij. Ceremonia u mbajt e fshehtë dhe Cruise nuk ka bërë ende ndonjë koment për të.
Edhe pse Cruise nuk u fotografua zyrtarisht në ceremoninë e hapjes, ai mori pjesë së bashku me një sërë yjesh, duke përfshirë Sarah Jessica Parker, Matthew Broderick, Shaun White dhe Nina Dobrev, Lindsey Vonn, Serena Williams, Cynthia Erivo, Ariana Grande, Snoop Dogg, Chrissy Teigan, John Legend, Tyla, Queen Latifah dhe Rebel Wilson.
