Më shumë se 50 njerëz kanë humbur jetën në Indi gjatë tri ditëve të fundit, si pasojë e një vale të të nxehtit që përfshiu disa rajone të këtij vendi. Së paku 33 veta vdiqën në shtetin verior, Utar Pradesh, thanë autoritetet atje. Mediat e huaja shkruajnë se rastet u raportuan pasi temperatura u rrit mbi 50 gradë Celsius në pjesë të Indisë së Veriut, duke përfshirë Delhi, Uttar Pradesh, Rajasthan dhe Bihar këtë javë.
Në shtetin Odisha, ndërkaq, humbën jetën së paku 20 njerëz. Ministria federale e Shëndetësisë tha se ka evidentuar së paku 56 vdekje si pasojë e të nxhetit nga 1 marsi deri më 30 maj. India, çdo pesë vjet, i mban zgjedhjet e saj të përgjithshme në prill dhe maj. Por, këtë vit, temperaturat ishin rekorde – mbi 45 gradë Celsius, e në disa zona edhe 50 gradë.
Departamenti i Motit i Indisë tha se temperaturat ka gjasa të bien në ditët në vijim, për shkak të fillimit të shirave. Disa rajone janë duke përjetuar, po ashtu, mungesa të mëdha të ujit dhe energjisë elektrike, për shkak të rritjes së konsumit gjatë vapës.
