Detaje të reja dalin në dritë nga gazeta italiane e njohur “La Repubblica” për kryeministrin shqiptar Edi Rama. Gazeta e njohur, nëpërmjet një shkrimi zbuloi se Rama u tërbua nga reportazhi i ‘RAI-it’ që bëri bujë të madhe në vendin tonë dhe në Itali, ndaj ka telefonuar drejtorin e ‘RAI-t’, Paolo Corsini (lexo këtu).
View this post on Instagram
Sot, Antonio Fraschilla shkruan për ‘La Repubblica’ se Rama kërkoi hapësirë për një përgjigje pas episodit të Rai që u transmetua të dielën e kaluar dhe që vendos në epiqendër marrëveshjen për emigrantët mes Italisë dhe Shqipërisë.
Repubblica shkruan se Rama i ka thënë Corsinit: “Vetëm një mesazh me të cilin kërkova të diskutonim”. Më pas të martën Rama konfirmoi se kishte pasur “një bisedë krejtësisht të qetë” me menaxherin e televizionit publik italian, duke i bërë të ditur arsyet e tij. Sipas tyre, Rama pret një përgjigje qoftë edhe me intervistë.
Po ashtu, zbulohet se kryeministrja italiane Giorgia Meloni ka kryer një telefonatë në La Stampa për këtë çështje. Sipas mediave italiane, çështja e emigrantëve do të trajtohet sërish, e madje ditën e dielë (28 prill) do të dalin në dritë detaje të reja që pritet të thellojnë më shumë kryeministrin.
Reportazhi i emisionit ‘Report’ në “Rai 3”, i publikuar mbrëmjen e 21 prillit ka bërë bujë në Itali dhe Shqipëri, pasi u tha se marrëveshja për refugjatët mes Shqipërisë dhe Italisë është hartuar për interesa të errëta. Për realizimin e reportazhit, gazetari italian Giorgio Mottola vizitoi edhe Shëngjinin ku do të ndërtohen edhe qendrat e pritjes së emigrantëve nga Italia. Sipas reportazhit, përmendet se personi kyç pas kësaj marrëveshje është Engjëll Agaçi, Sekretari i Përgjithshëm i Këshillit të Ministrave, i konsideruar edhe si një ish-avokat të trafikantëve të drogës. Në reportazh përmendet se krimi ka arritur në nivele të larta të qeverisë shqiptare, madje edhe vetë vëllai i Edi Ramës, Olsi është i implikuar me kartelet e drogës.
