Hiti viral i momentit në Netflix, quhet ‘Baby Reindeer’. Seriali ka shkaktuar reagime të forta te shikuesit dhe kritikët, raporton ‘Forbes‘.
Seriali me shtatë episode u shkrua dhe u krijua nga komediani skocez Richard Gadd.
Seriali tregon jetën e Donny-t teksa ai takon një grua të vetmuar të quajtur Martha (Jessica Gunning) e cila shndërrohet nga një mike në stalker (përndjekëse). Donny përpiqet të shpëtojë nga kontrolli i obsesionit të Martës, ndërsa përpiqet të lundrojë në efektet e vazhdueshme të traumës së kaluar.
Që në skenën e parë, Baby Reindeer tërheq shikuesin, me një Donny dukshëm të dëshpëruar.
A është ‘Baby Reindeer’ i bazuar në një histori të vërtetë?
Richard Gadd tha se seriali është “emocionalisht 100% i vërtetë“, me ngjarjet e tregimit “të huazuara nga raste që më kanë ndodhur dhe njerëz të vërtetë që kam takuar. Por sigurisht që nuk mund të bësh të vërtetën e saktë, për arsye ligjore dhe artistike.”
Është një nga ato histori që është më e çuditshme se trillimi; Baby Reindeer nuk i mbulon realitetet e çrregullta të jetës dhe nuk ka frikë të tregojë cënueshmërinë e njerëzve.
Gadd nuk e redukton historinë në atë të përndjekësit dhe viktimës, por thekson humanitetin e të gjithë të përfshirëve. Gadd ishte i kujdesshëm që të mos e trajtonte personazhin e Martës si “një përbindësh” sepse ai beson se “ajo nuk është mirë dhe sistemi e ka dështuar”.
Baby Reindeer mbulon shumë tema të ndjeshme. Bëhet fjalë për vetminë, obsesionin, iluzionin dhe mënyrën se si viktimat meshkuj të dhunës seksuale luftojnë për t’u marrë seriozisht, nga shoqëria apo edhe vetë ata.
Mbi të gjitha, Baby Reindeer është një histori për natyrën radioaktive, gërryese të traumës dhe të gjitha mënyrat e çrregullta që ajo manifestohet në jetën e dikujt.
