Ju kemi njohur më herët me rastin e “Qershizat Shop” dhe “Fashion Online 01”, biznese të shtetasit me iniciale L.A., që mashtronte vazhdimisht klientët dhe u denoncua në kanalin tonë në Telegram, “QYTETARËT“.
L.A. së bashku me R.L., nisën kërcënimet, përndjekjen, shantazhin ndaj gazetarëve dhe punonjësve të kompanisë, si dhe krimin kibernetik ndaj bizneseve tona me karta false, duke shkaktuar rreth 40,000 euro dëm ekonomik- e gjitha për të zhdukur nga media jonë provat që vërtetonin mashtrimet e tyre.
Mirëpo, edhe pse u treguan mosbesues ndaj ligjit dhe drejtësisë, si dhe nënvlerësuan fuqinë e fjalës së lirë të medias tonë, pas denoncimit ata u thirrën sot në Polici!
Dy qytetarët do të përballen me forcën e ligjit për kërcënime, ofendime, shantazh, përndjekje dhe krim kibernetik.
Rasti jonë ishte i ngjashëm me rastin fatkeq të ditës së djeshme: Një 27-vjeçare i dha fund jetës pas shantazhit se do t’i publikoheshin fotot private. Të njëjtin shantazh bënë edhe dy qytetarët ndaj gazetares, duke deklaruar se të dhënat e saj ishin në kanalin me përmbajtje pornografike në Telegram.
Mirëpo, në asnjë moment nuk ramë pre e presioneve dhe i qëndruam punës tonë pavarësisht pengesave, duke kërkuar në bashkëpunim forcën e ligjit e të drejtësisë shqiptare.
Asnjë presion s’na bën dot të heshtim, ndaj me të gjitha provat materiale të siguruara, iu drejtuam Policisë.
Ky institucion na njoftoi se dy qytetarët e kallëzuar janë thirrur sot në Drejtorinë e Përgjithshme të Policisë, ndërsa ndaj tyre po procedohet me hetimet e nevojshme. Çështja më tej do të procedojë në Prokurori, ndërsa dy shtetasit do të marrin dënimin e merituar.
Rasti i ndodhur në redaksinë tonë, është prova konkrete që tregon se presionet, shantazhi e kërcënimet s’duhet t’ju bëjnë të heshtni për të kërkuar drejtësinë tuaj. Asnjë kërcënim nuk është aq i fortë përpara ligjit e drejtësisë, ndaj ndjehuni të lirë të kërkoni të drejtën tuaj duke denoncuar.
Kanali ynë në Telegram, QYTETARËT, është gjithmonë i hapur për denoncime! E drejta dhe fjala e lirë, vlejnë po aq sa jeta!
Vijon…
