Teksa kanë kaluar vetëm disa ditë nga zbardhja e rastit të rëndë të Jetnor Zhabolit në Tiranë, një ngjarje e ngjashme u zbulua sot në Kamëz. 34-vjeçari Asqeri Mandri dhunonte dhe mbante të mbyllur në shtëpi, duke e monitoruar me kamera, bashkëshorten e tij.
I riu kishte 6 muaj që ishte kthyer nga Gjermania, ku më parë punonte, teksa pas kthimit në Shqipëri, ai kishte mbetur pa punë. Nga xhelozia e tepërt, ai kishte penguar fillimisht bashkëshorten e tij që të punonte, duke e mbyllur në shtëpinë e tyre në Kodër-Kamëz. Ai ushtronte dhunë ndaj saj, e po ashtu e kontrollonte me kamera në çdo moment.
E reja ka deklaruar para bluve se nuk ka shkuar 2 javë në punë prej xhelozisë së bashkëshortit. Ajo shton se ai ka shfaqur shenja të theksuara xhelozie dhe gjithë kohën e shante duke e akuzuar edhe për tradhti.
Policia ka vënë në pranga të riun pas denoncimit të bashkëshortes së tij, ndërsa kanë nisur hetimet për zbardhjen e plotë të ngjarjes.
Dyshimet e para lidhen me shkaqe xhelozie, ndërsa pritet që të merren në pyetje e shoqja dhe nëna e tij, e cila jetonte në të njëjtën banesë. Nga ana tjetër, kur u pyet pse e monitoronte gruan, Mandri është shprehur “kështu ma dha truri”.
Çifti janë prindër të katër fëmijëve të mitur, ndërsa dyshohet se Mandri përveç izolimit që i kishte bërë të shoqes, edhe e dhunonte.
