Nga Eliona Shkreli/ Anëtare e Këshillit Bashkiak Shkodër
I ndodhur përballë reagimeve të drejta mbi çështjen e shkrirjes së teatrit “Migjeni” kryebashkiaku i Shkodrës u detyrua të bënte një reagim përmes rrjeteve sociale në lidhje me të “vërtetën”, sipas tij, një reagim që përgënjeshtron askënd tjetër përveçse administratën që ai drejton dhe dokumentacionet që ai vetë firmos e vulos, duke ligjëruar atë që tani përgënjeshtron.
Në statusin e Tij në Facebook, kryebashkiaku Beci thotë që asnjëherë s’ka gënjyer, por harron se Shkodra nuk e ka memorien e shkurtër.
Si mundet një kryetar bashkie të reagojë mbi atë që është pastërtisht e shkruar e zeza mbi të bardhë, se teatri “Migjeni” si institucion në varësi të Bashkisë Shkodër do të shkrihet? Në letrat zyrtare, në asnjë rresht nuk përmendet riorganizimi apo ristrukturimi që përmendet në reagimin e Tij.
Në projekt-vendimin që na u paraqit në Këshillin Bashkiak për t’u miratuar në mbledhjen e miratimit të buxhetit, përcaktohet qartë termi i përdorur “shkrirje”, gjithashtu në shkresën zyrtare të urdhrit për shkrirjen e disa drejtorive, citohet se ‘fati i keq’ prek edhe teatrin “Migjeni”.
Po si mundet një kryetar bashkie të përgënjeshtrojë dokumentet zyrtare të formuluara nga administrata e Tij dhe të firmosura nga vetë Ai dhe të pretendojë se gënjeshtarët realë janë përfaqësuesit e opozitës, që nuk kemi bërë asgjë tjetër sesa të paraqesim në dritë të diellit të vërtetën e shkresave të kontrolluara nga vetë Ai?
Urdhëri nr.84 datë 24.01.2024 me nr. protokolli 1257 ” PËR SHKRIRJEN E INSTITUCIONEVE TË VARËSISË NË BASHKINË SHKODËR” nuk flitet në asnjë rresht të tij për ristrukturim të funksionimit të Teatrit “Migjeni”, por për shkrirje të tij.
Po ashtu projekt-vendimi i Këshillit Bashkiak i miratuar në mbledhjen e fundit të vitit të miratuar nga votat e Rilindjes dhe PSD-së, citon termin shkrirje dhe jo ristrukturimin.
Prandaj, i nderuar zoti kryebashkiak, përpara se të sh’fajësosh veten dhe të akuzosh në stilin ” mbrojtja më e mirë është sulmi”, ndrysho’ vendimin e Këshillit Bashkiak nr. 71 ( i ndryshuar) në të cilin thuhet ‘shkrije’ dhe jo ‘ristrukturim’. Po ashtu bëni transparente mënyrën sesi do funksionojë Teatri “Migjeni” pas katrahurës që ke krijuar së bashku me stafin tënd.
Por siç duket historia dhe tradita e këtij qyteti nuk kanë rëndësi për turistët politikë të importuar nga Rilindja, për ta është I rëndësishëm gllabërimi dhe kontrolli edhe i jetës kulturore të Shkodrës.
Kur rreni, rreni ma’ bukur në mënyrë që edhe Ju t’a besoni rrenën tuj, ose të paktën mos bani za’ meqë marre ( turp) nuk keni.
P.S Ju lutem, na shpjegoni edhe fjalën ‘kukturë’ çfarë kuptimi ka, meqë e keni përdorur në shkresën zyrtare që keni firmosur dhe vulosur I nderuar kryetar I bashkisë Shkodër.
