Është zbardhur dëshmia e dy adoleshentëve të cilët akuzohen për vrasjen e 18-vjeçarit Lulzim Fejzullahu në Podujevë, ngjarje e ndodhur një javë më parë.
16 dhe 17-vjeçari kanë kundërshtuar kërkesën për paraburgim me akuzën për “Vrasje”, gjatë seancës dëgjimore të mbajtur më 15 janar 2024 në Gjykatën Themelore në Prishtinë.
Njëri prej të miturve ka dëshmuar se në ditën kur ndodhi ngjarja kishte hapur xhamin e makinës dhe e kishte pyetur Fejzullahun, se pse e kishte sharë.
Më pas i mituri pretendon se i ka kërkuar shokut të tij që të ndalojë makinën për t’u sqaruar me 18-vjeçarin, i cili sipas tij e goditi me thikë në këmbë.
“Ai u afrua në makinë me thikë, më sulmoi dhe më goditi në këmbë. I dyshuari i dytë ishte me mua, ai ka dalë nga makina dhe ja ka kapur dorën L. F. Kemi ikur nja 10 metra me gomën e makinës të shpuar”, dëshmon ai.
Më pas ka pretenduar se viktima ka nxjerrë thikën dhe ai është detyruar ta godasë me shkop në kokë.
“E kam kapur shkopin dhe kemi hyrë në makinë. L. F., po na ndiqte. Kur e pashë që kishte thikë, në ato momente dola prej vetes. Nuk e kam përplasur me makinë, kam dalë dhe i kam rënë me shkopin e drurit në dorën ku mbante thikën. I kam kërkuar ta lërë thikën por s’ka pranuar dhe e kam goditur mbrapa kokës në anën e djathtë”, dëshmon ai.
Ndër të tjera i riu tregon se nuk e kishte parë kur ka dalë nga makina shokun e tij dhe nëse e kishte goditur edhe ai Fejzullahun. Më pas deklaron se mosmarrëveshja kishte filluar pasi viktima i kishte zënë radhën tek berberi dhe e kishte sharë.
“E kundërshtoj kërkesën për caktimin e masës së paraburgimit. Jam dorëzuar në polici kam shkuar në spital dhe iu kam treguar se isha plagosur me thikë. Nuk jam arratisur. mosmarrëveshja kishte ndodhur një ditë përpara sepse L.F., më kishte zënë radhën te berberi dhe më ka sharë”, dëshmon ai.
