Sot iu dha lamtumira e fundit artistit dhe mjeshtrit të madh Zef Deda. Aktori, Zef Deda humbi jetën mesditën e djeshme në moshën 73-vjeçare pas një sëmundjeje të rëndë.
Aktori i madh i humorit, Zef Deda është përcjellë me duartrokitje nga teatri “Migjeni” për në banesën e fundit.
Djali i tij Julian Deda ka disa fjalë të ndjera për babain e tij, përpara se ta përcjell përgjithmonë.
“Kam dëshirë me falenderu Zef Dedën. Një baba dhe bashkëshort i jashtëzakonshëm, gjysh i mrekullueshëm, aktor shumë i madh. Nuk e di se sa të fokusuar duhet të jemi unë edhe Mario dhe fëmijët tanë për të ruajtur emrin që ai ka lënë në Shkodër dhe Shqipëri.
Shpresoj t’ia dalim, por besoj se një ndihmë e madhe do të jetë edhe baba duke na ruajtur nga lart. Me punën e tij, me moralin e tij dhe mënyrën se si është sjellë në jetë, na e ka bërë jetën më të lehtë.
E falënderoj nga zemra. Kam dëshirë t’ju falënderoj dhe ju, kolegët e babës, për shumë vite. Keni marrë dhe keni dhënë me njëri-tjetrin. Jeni një brez që keni ruajtur miqësinë me njëri-tjetrin, sot nuk është më kjo.
Unë dua t’ju kërkoj meqenëse sot është për herë të fundit në teatrin ‘Migjeni’ një duartrokitje”, u shpreh djali i Zef Dedës, aktori Julian Deda.
