Janë publikuar të tjera pamje filmike nga ngjarja e tmerrshme që ndodhi në kopshtin privat “Stinët”, në rrugën Kushtrimi i Lirisë në Tiranë, ku dhuna e edukatores theu këmbën e 3-vjeçares.
Në videot e publikuara, vajza dëgjohet të rënkojë në shtrat nga dhimbja, ndërkohë që edukatorja i shkon pranë që të shohë gjendjen e saj.
Mirëpo, në pamjet e publikuara mungojnë 3 orë filmim, mungesa e të cilave duket se fsheh atë që vërtetë ka ndodhur në kopshtin “Stinët”.
Ministria e Arsimit dhe Sportit i ka kërkuar Policisë së Shtetit dhe Policisë Bashkiake mbylljen e menjëhershme të kopshtit, i cili pas verifikimeve rezultoi në paligjshmëri dhe i palicensuar.
Nisur nga skandali, Ministria ka ngritur një Task-Forcë me Policinë e Shtetit, Policinë Bashkiake, dhe Inspektoriatet për kontrollin e plotë në territor të subjekteve që ushtrojnë veprimtarinë në shërbimet parashkollore për fëmijë.
Edhe institucioni i Avokatit të Popullit reagoi për ngjarjen makabre ndaj 3-vjeçares në kopshtin privat “Stinët”. Me urdhër të Avokates së Popullit, Erinda Ballanca, është ngritur një grup hetimor me punonjës socialë e juristë, për hetimin administrativ të rastit dhe për të monitoruar të gjitha veprimet e mosveprimet e institucioneve përgjegjëse shtetërore.
Ndërkohë, qyetatarët do të protestojnë ditën e nesërme në orën 17:00 para Ministrisë së Arsimit, për të kërkuar drejtësi dhe siguri për fëmijët!
