Me ngjarjen e një dite më parë mund të themi se SPAK po vendos duart edhe në pastrimin e kupolës së lartë të politikës 32-vjeçare.
Arrestimi i dhëndrit të ish-kryeministrit Sali Berisha, Malltezit dhe Fatmir Bektashit për privatizimin e ish-klubit sportiv “Partizani”, ka bërë që të lëvizin gurët edhe persona apo firma të tjera që kanë abuzuar me taksat tona ndër vite.
Dikur veç fjalë, tani nuk janë vetëm kërcënime boshe pasi rastet po denoncohen me fakte dhe po hapen dosje e të gjithëve në SPAK.
Së fundmi “CNA” ka zbuluar një dokument që thellon skandalin e inceneratorit të Tiranës, i cili ka marrë 110 milionë euro nga taksat e shqiptarëve.
Kjo shkresë tregon se 3 kompani, “Energy Recuperator” dhe “Paul Wurth Italia”, së bashku me “ITS”-në e Klodian Zotos shprehin interes për landfillin e Tiranës.
Letra mban datën 23 qershor 2016 dhe shpjegon propozimet e grupit prej 3 kompanish për menaxhimin e mbetjeve në kryeqytet.
Dokumenti i publikuar sot vërteton se qeveria shqiptare, që Bashkia e Tiranës kanë qenë në dijeni të faktit se Klodian Zoto po qëndronte pas inceneratorit të Tiranës.
Për t’u rikthyer tek arrestimi i dhëndrit të Sali Berishës dhe bashkëpunëtorit të tij, detaje të reja kanë dalë në dritë. SPAK konfirmon në dosjen hetimore se ishte Bashkia e Tiranës, e drejtuar asokohe nga kryeministri aktual Edi Rama, që mori vendimin që trualli i kompleksit sportiv të kalojë nga zonë sportive në zonë banimi. Më pas, ky vendim u konfirmua nga KRRTRSH-ja e drejtuar nga ish-kryeministri Sali Berisha.
“Me vendimin nr. 132 date 08.06.2006 te kryetarit te KRRT-se, Bashkia Tiranë (nr. 277 prot date 28.06.2006), është vendosur nder të tjera që të miratohet kërkesa per ndryshimin e destinacionit për zonën Rruga “Frosina Plaku” dhe Planit Rregullues nga zonë sportive ne zonë banimi. Ky vendim hyn në fuqi pas miratimit nga KRRTRSH-ja. KRRT-ja e kryesuar nga shtetasi Sali Berisha, me vendimin nr. 4 date 21.11.2006 te Keshillit të Rregullimit te Territorit te Republikës të Shqiperise “Permiratimin e ndryshimit ne planin rregullues te Qytetit te Tiranes ne lidhje me zonimin funksional per disa zona të qytetit” perfshihet edhe zona me siperfage 0.7 ha në Rrugën “Frosina Plaku”, e cila ndryshohet nga “zone sportive” ne “zone banimi””, thuhet në dosjen hetimore të SPAK.
Sakaq shpresojmë që në vazhdim t’ja nxjerrin njëri-tjetrit të gjitha shkeljet dhe mashtrimet dhe të gjithë shkelësit e ligjit të përfundojnë në SPAK.
