Shqipëria synon ditën e sotme (e enjte) suksesin e radhës në grupin E të eliminatorëve të ‘Euro 2024’.
Kuqezinjtë do të luajnë ndaj Çekisë në stadiumin “Air Albania” nga ora 20:45.
E në këtë natë do të ketë një surprizë shumë të veçantë. Sonte në stadium do të performojë artistja e mirënjohur shqiptare, Shkurte Fejza.
Ajo pritet të interpretojë live këngën e saj të famshme “Mora fjalë”, e cila nuk ka dyshim se është një hit i të gjitha kohërave.
“Këngëtarja e mirënjohur Shkurte Fejza do të jetë sonte live në stadium dhe do të këndojë atë këngën e bukur ‘Mora Fjalë’. Do të jetë një këngë që do të këndohet nga gjithë publiku dhe do të jetë Shkurte Fejza live që do të jetë në stadium. Ky është lajmi sensacional, më i bukur që do ta shoqërojë sonte kombëtaren shqiptare ndërkaq që në çdo karrige të tifozëve do të ketë nga një plis, do të ketë një koreografi të mrekullueshme, sonte nuk do të jetë vetëm një ndeshje.
Sonte është një spektakël, një spektakël kuq e zi që urojmë të kemi një rezultat pozitiv sepse rezultati pozitiv do ta zbukuronte këtë mbrëmje do ta bënte historike për ne shqiptarët pasi gjithsej na duhen vetëm pesë pikë për të shkruar në Gjermani, nëse fitojnë sonte na ngelen vetëm dy, është një shans i madh që Shqipëria për herë të dytë të prek finalen e një Kampionati Evropian, Euro 2024”, tha gazetari Dëfrim Methasani.
