E njohur si Dita Ndërkombëtare e Vajzave, 11 tetori është një ditë që festohet në të gjithë botën për të sjellë dritë dhe për të luftuar padrejtësitë dhe pabarazitë me të cilat përballen vajzat për shkak të gjinisë së tyre.
-Sipas fakteve botërore të mbledhura për këtë ditë përreth globit, vajzat janë tri herë më shumë të kequshqyera se djemtë.
-Çdo vit rreth dy milionë vajza të moshës 5 deri në 15 vjeç janë të trafikuara, të shitura ose të detyruara të punojnë në tregtinë e seksit.
-Në aspektin shëndetësor, të dhënat botërore tregojnë se një foshnjë vajzë ushqehet me gji nga nëna deri në tetë javë më pak se një foshnjë djalë. Nga ushqyerja me gji mund të parandalohen rreth një milion vdekje të fëmijëve në vit.
-Në aspektin social, vihet re se në botë 1 në çdo 3 vajza është e martuar para moshës 18 vjeç.
-Të dhënat mbi arsimin tregojnë se në mbarë botën rreth 36 milionë vajza në moshë për të nisur shkollën fillore nuk janë të regjistruara në shkollë. Ndërkohë, mendohet se arsimimi më i mirë i vajzave dhe grave mund të reduktojë me 16 për qind urinë e njerëzve në botë.
