Edhe pse nuk jemi në sezonin e dimrit shirat masive nëpër botë po shkaktojnë një kaos të vërtetë duke regjistruar numër rekord viktimash, dëme të shumta materiale dhe banesa të shkatërruara.
Së fundmi stuhia ‘Daniel’ është bërë shkak i përmbytjeve në Libi, ku sipas BBC deri më tani autoritetet vendase kanë konfirmuar një numër viktimash 18.000 deri në 20.000.
Mediat saudite bëjnë me dije se numri i qyteteve të përmbytur është i lartë dhe se trupat e pajetë po gjenden nën rrënoja ose në det, duke rritur kështu rrezikun për sëmundje. Sakaq, autoritetet në Libi kanë kërkuar ndihmë ndërkombëtare për të përballuar situatën alarmante.
Stuhia ‘Daniel’, e cila goditi vendin e Afrikës Veriore të dielën solli shi të dendur disa ditë më parë. Për shkak të dendësisë së prurjeve u shembën edhe dy digat e mëdha në Derna një qytet me rreth 100.000 banorë duke bërë të mundur krijimin e këtij kaosi.
