Me ndryshimin e stinës, ndryshime të menjëhershme kanë pasur edhe kushtet atmosferike në pjesën më të madhe të globit. Vende të cilat përjetuan tmerrin e valës së nxehtë në verë, zjarre masive e shfarosëse, tashmë po përballen me një tjetër ekstrem.
Vendi fqinj Greqia prej tri ditësh po përballet me motin e keq ‘Daniel’, shira të rrëmbyeshëm, furtuna dhe me dëme katastrofike.
Zonat si Magnezinë, Thesali, por veçanërisht në Kardicë, Trikalla ka pasur probleme të theksuara për shkak të përmbytjeve.
Mediat greke bëjnë të ditur se deri më tani janë regjistruar 2 viktima njëri prej të cilëve është fermer shqiptar 51-vjeç, që humbi jetën pas shembjes së një muri në Volos.
Sipas njoftimeve nga stacionet e trenave, linjat ndërmjet Athinës dhe Selanikut janë mbyllur. Gjithashtu një thirrje u është bërë edhe banorëve në zonat nëntokësore të Palamasit të largohen për shkak të vërshimeve të shumta.
Ndërkohë kujtojmë se gjatë muajit korrik dhe gusht në Greqi u shënuan zjarret më masive pas shumë vitesh në të gjithë Europën. Kjo i solli një dëm të madh ekonomik edhe në aspektin e turizmit, pasi flakët shkrumbuan vendet më të preferuara nga turistët, kryesisht ata britanikë.
