Jo vetëm që nuk ulën çmimet pas shtetëzimit, por në IdentiTek mungojnë kuponat emergjentë për pasaportat!
Problem serioz për qytetarët!
Pavarësisht premtimeve për uljen e çmimit të pasaportave dhe kartave ID pas shtetëzimit, shifrat mbetën të njëjta duke na i rrjepur xhepat njësoj si koncesioni i francezëve (Kompania Aleat), ndërsa tashmë raportohen të tjera probleme.
Kompania IdentiTek që po vazhdon të zhvasë shqiptarët, e ka nisur punën me mungesë kuponash emergjentë për pasaportat, siç raporton një denoncues në redaksinë tonë.
Për shkak të kësaj mungese, biletat e avionit po digjen dhe qytetarët rrezikojnë të humbasin jo vetëm fluturimin por edhe vendin e tyre të punës jashtë shtetit, si pasojë e mungesës së përgjegjësisë nga qeveria shqiptare.
Drejtoresha e institucionit, Loina Prifti, nuk është bërë e gjallë për këtë problematikë, ndërsa nga ana tjetër hesht edhe Ministri i Brendshëm, Taulant Balla.
Më herët ish-Ministri i Brendshëm, Bledi Çuçi, premtonte ulje të çmimeve abuzuese të pasaportave dhe kartave ID, sapo shtetëzimi të kalonte në dorën e shtetit. Mirëpo, të njëjtat çmime abuzuese vazhdojnë të mbahen dhe sot.
Tarifa për kartën e identitetit mbetet 1,500 lekë, pajisja me pasaportë 7,500 lekë për aplikimin standard dhe 18,000 lekë për aplikimin e shpejtë. Pra, fitimet marramendëse nga xhepat e shqiptarëve do të shkojnë në arkën e qeverisë.
Përpos këtyre shkeljeve, qeveria shqiptare nuk ofron asnjë garanci se të dhënat tona sensitive nuk do të keqpërdoren, siç ndodhi me skandalin e patronazhistëve, sulmin ndaj e-Albania, rrjedhjen e databazës së pagave, targave, nr të telefonit, goditjen e sistemit të Policisë dhe sistemit bankar.
