Ministria e Arsimit ka dhënë ditën e sotme një udhëzim për vitin e ri shkollor dhe ai ka të bëjë me disa ndryshime që do të pësojë rregullorja, që lidhet kryesisht me numrin e nxënësve nëpër klasa e shkolla.
Sipas këtij udhëzimi, të gjitha gjimnazet dhe shkollat e orientuara, duhet të ulin numrin nga 35 në 30 nxënës në klasë, teksa vendimi ka për qëllim rritjen e cilësisë së orës mësimore, si dhe kushte më të favorshme për mësuesit dhe nxënësit.
Ky nuk është i vetmi vendim i marrë dhe i postuar nga Ministrja Evis Kushi në rrjetet sociale, për vitin e ri shkollor. Ndër të tjera thuhet se në shkollat ku numri i nxënësve arrin mbi 800, shkolla do të ketë tre nëndrejtorë. Rritja e numrit të nëndrejtorëve ka si qëllim një menaxhim më efektiv të shkollave, monitorim dhe rritje të vëmendjes për nxënësit.
Edhe për të gjitha shkollat e arsimit special për nxënësit me aftësi ndryshe, për herë të parë do të kenë edhe nëndrejtor, pavarësisht numrit të nxënësve, me qëllim plotësimin e nevojave dhe kërkesave që ka kjo kategori e shoqërisë.
