Xhirimet e filmave “Deadpool 3”, vazhdimi i ”Gladiatori”-t dhe edicioni i tetë i ”Mission: Impossible” janë pezulluar, e shkak është bërë greva e aktorëve në Hollywood.
Aktorët në disa qytete në SHBA u janë bashkuar skenaristëve në grevën e tyre, duke u larguar nga puna për një kohë të pacaktuar.
Ata duruan temperaturat përvëluese për të protestuar përpara studiove të filmit dhe selisë së shërbimeve të transmetimit dhe stacioneve televizive. Yjet si Susan Sarandon dhe Jason Sudeikis ishin në mesin e atyre që protestonin.
Kjo është hera e parë që nga viti 1960 që aktorët dhe skenaristët protestojnë së bashku. Sindikata e aktorëve SAG-AFTRA po kërkon pagesa më të mira për anëtarët e saj dhe rregullore mbi përdorimin e inteligjencës artificiale.
Greva e aktorëve u vendos zyrtarisht të enjten pasi nuk u arrit asnjë marrëveshje me Shoqatën e Studiove të TV dhe Filmit (AMPTP) megjithë negociatat me javë të tëra.
Megjithatë, ka të ngjarë të kalojë pak kohë para se shikuesit e kinemasë të vënë re efektet e grevave. Nuk dihet nëse këtyre grevave do t’i bashkohen edhe aktorët e njohur të Hollywood-it.
