Ish-presidenti i Shteteve të Bashkuara të Amerikës, Bill Clinton ka vizituar ditën e sotme Shqipërinë. Një ngjarje e veçantë kjo jo vetëm për shtetin tonë, por edhe gjithë Shqiptarinë.
Përpos krerëve të lartë të shtetit, Clinton u mirëprit edhe nga disa të rinj dhe fëmijë nga Kosova, me emrin “Klinton” të cilët e falënderuan përzemërsisht dhe me plot emocion për rolin e tij në çlirimin e Kosovës. Të rinjtë kishin udhëtuar nga Kosova për të mirëpritur Bill Clinton.
Përpos popullit të Kosovës, edhe Bill Clinton duket se ruan një dashamirësi të madhe për këtë shtet. Gjatë fjalës së tij ditën e sotme ai ka treguar një ngjarje emocionuese që i ka ndodhur teksa darkonte në një restorant në New York, me miqtë e tij. Ai tha se një nga kamarierët i cili ishte nga Kosova, i kishte shkuar dhe i ishte ulur në gjunjë duke i thënë se familjen e kishte gjallë falë tij.
“Kur isha në një restorant në New York dhe një kamerier erdhi të merrte porosinë. Uli tabakanë që kishte ujin dhe u ul në gjunjë dhe më tha falë teje familja ime është gjallë. Dhe njerëzit e tjerë me të cilat isha nuk e kishin idenë se çfarë kishte ndodhur dhe u shpjegova se ishte shqiptar nga Kosova.
Ai u çua foli pak për jetën familjare dhe tha vazhdoni kështu. Mos i hidhni njerëzit poshtë. Ju keni ndërtuar këtu diçka të lavdishme dhe bëni që njerëzit që të vijnë këtu që vendi i tyre te jetë më shumë si i juaji. Ju dikur ishit një derë e zymtë e mbyllur ndërkohë tani jeni një derë e hapur”. tha Clinton.
Bill Clinton cilësohet si heroi i Kosovës dhe jo pa të drejtë. Ishte ai në rolin e presidenti të SHBA-ve kur mori vendimin historik në vitin 1999 për ndërhyrjen e NATO-s në çlirimin e Kosovës.
“Unë gjithmonë do të jam krenar me faktin se unë isha president i SHBA-së në kohën kur ju patët nevojë që dikush të ngritet dhe ta thotë se nuk ka më spastrim etnik, nuk ka më përndjekje të njerëzve nga shtëpitë e tyre, jo më vrasje të civilëve të pafajshëm”,-është shprehur më herët Clinton.
Në vitin 2009 Bill Clinton-it iu ngrit statuja në qendër të Prishtinës (në sheshin që mban po emrin e tij), në shenjë mirënjohje për rolin e tij në çlirimin e Kosovës nga forcat serbe.
