Ish kryeministri i Britanisë së Madhe Boris Johnson i është rikthyer profesionit të vjetër. Pasi hoqi dorë edhe nga mandati i deputetit për shkak të skandalit të “Party gate”, Johnson do të punojë si gazetar.
Ai ka arritur një marrëveshje me gazetën Daily Mail në të cilën do të ketë rubrikën e tij javore.
“Ne jemi të kënaqur të shpallim Boris Johnson si kolumnistin tonë të ri. I njohur si një nga shkrimtarët më të zgjuar dhe origjinal, rubrika e Boris do të publikohet në Daily Mail çdo të shtunë”, njoftoi gazeta britanike në një postim në Twitter.
Boris Johnson filloi karrierën e tij si gazetar në “The Times” të Londrës dhe më vonë vazhdoi në “Daily Telegraph”. Ai u bë asistent redaktor në të njëjtën gazetë nga viti 1994 në 1999 dhe më vonë redaktor në “The Spectator” nga 1999 deri në 2005.
Në vitin 2001, ai nisi karrierën në politikë, fillimisht si deputet dhe më pas në 2008 u bë kryetar i Bashkisë së Londrës. Në vitin 2019, ai u zgjodh kryetar i partisë konservatore dhe mori detyrën e kryeministrit.
