Recep Tayyip Erdogan ka fituar zgjedhjet presidenciale, duke u shpallur sërish President i Turqisë.
Fitorja erdhi pas një balotazhi me kundërshtarin e tij kryesor, kreun e opozitës, Kemal Kilicdaroglu. Erdogan arriti të merrte 52.14 % të votave ndërsa Kilicdaroglu 47.89 %.
Kreu i Këshillit Zgjedhor, Ahmet Yener, tha se numri i votave të numëruara është mbi 26 millionë.
Ai ka falenderuar të gjithë personat që e kanë votuar.
“Dëshiroj të falënderoj qytetarët që e votuan. Dua të falënderoj njerëzit tanë që na dhanë përgjegjësinë për të qeverisur vendin për pesë vitet e ardhshme. Ne do të jemi të denjë për besimin tuaj”- tha ai.
Më tej ai ironizoi kundërshtarin e tij Kemal Kilicdaroglu, duke thënë para turmës: “Bye, bye, bye Kemal”.
Më shumë se 64.1 milionë njerëz ishin të regjistruar për të votuar, duke përfshirë mbi 1.92 milionë të cilët tashmë kanë votuar në qendrat e votimit jashtë shtetit.
