Peter Dundas u largua nga pozicioni si drejtor kreativ në markën “Roberto Cavalli”, vetëm 19 muaj pasi mori këtë rol. Pasardhësi i tij ende nuk është emëruar.
Dizajnuesi iu bashkua markës në mars të 2015-s, pas një bashkëpunimi me “Pucci”-n, ku mbante të njëjtin pozicion. Ai punoi edhe më herët për “Cavalli”-n, nga viti 2002 në 2005-n, si dizajnuesi kryesor i markës.
“Dua të falënderoj Roberto Cavalli dhe Grupin për këtë përvojë të vlefshme dhe i uroj më të mirën në përpjekjet e tyre në të ardhmen. U jam veçanërisht mirënjohës atelieve dhe ekipit që morën pjesë në këtë aventurë”, tha Dundas.
Koleksioni i tij i fundit për markën ishte pranverë/verë 2017, që u shfaq në Javën e Modës në Milano muajin e kaluar.
“Në emër të “Roberto Cavalli”-t dhe aksionarëve tanë, falënderojmë Peter Dundas për kontributin e tij në markë dhe i urojmë më të mirë për të ardhmen e tij. Pasi “Roberto Cavalli” po kalon përmes një periudhe transformimi, ekipi i dizajnimit do të vazhdojë dhe emërimi i një drejtori të ri kreativ do të bëhet në momentin e duhur”, tha Gian Giacomo Ferraris, kryedrejtori ekzekutiv.
Vetë Cavalli mbetet ende një aksionar.
Burimi: Harper’s Bazaar
