Elon Musk ka gjetur një shef të ri ekzekutiv për të drejtuar Twitterin. Lajmin e bëri me dije vetë Musk në Twitter, platformën sociale të cilën e bleu vitin e kaluar për 44 miliardë Dollarë.
Musk shkroi në Twitter: “Ajo do të fillojë pas 6 javësh!”
Në rrjet, përflitet se drejtuese do jetë Linda Yaccarino, drejtuesja e reklamave në NBCUniversal.
Kohët e fundit, Musk ka qenë nën presion të vazhdueshëm për të emëruar dikë tjetër në krye të “Twitter” në mënyrë që të fokusohej në bizneset e tij të tjera. Musk është akuzuar më parë nga aksionerët për braktisjen e Tesla-s pas marrjes së tij në Twitter dhe për dëmtimin e markës së kompanisë së makinave.
Yaccarino ka punuar në NBCU për më shumë se një dekadë, ku për herë të parë drejtoi shitjet e reklamave kabllore dhe dixhitale për kompaninë mediatike. Në vitin 2020, ajo u bë drejtore e reklamave dhe partneriteteve globale. Ekipi i saj ka gjeneruar më shumë se 100 miliardë dollarë në shitje reklamash që kur ajo iu bashkua kompanisë në vitin 2011.
