Paris Hilton ka treguar për ngacmimet që ka marrë nga mësuesi i saj kur ishte 14 vjeçe. Trashëgimtarja 42-vjeçare tregoi një kujtim të pakëndshëm që ka nga e kaluara, kur një mësues në shkollën e mesme e puthi.
Ajo ka treguar se personi të cilin e quan “Z. Abercrombie’ e kishte ‘ngacmuar’ kur ishte studente e re, duke e komplimentuar vazhdimisht dhe duke flirtuar me të çdo ditë.
“ Të gjitha vajzat në klasën time ishin të dashuruara me këtë mësues të bukur. Ai më bëri të ndihem sikur kujdesej për mua në një mënyrë kuptimplote. Më bënte lajka, më ngacmonte dhe më thoshte se të gjitha vajzat e tjera më flisnin pas shpine sepse ishin xheloze”, thotë ajo.
Mësuesi më pas i dha asaj numrin e tij të telefonit dhe i kërkoi që të mbante sekret kontaktin e tyre, zbulon Paris. “Z. Abercrombie më telefononte pothuajse çdo natë dhe flisnim me orë të tëra se sa tepër e pjekur, e bukur dhe inteligjente isha”, shkruan ajo .
Madje ajo përmend se mësuesi i ka “kujtuar” diferencën 13-vjeçare në moshë mes princeshës Diana dhe princit Charles dhe se Priscilla Presley ishte vetëm 14 vjeçe kur Elvis Presley ra në dashuri me të.
Siç përshkruan më vonë Paris Hilton, mësuesi i saj e vizitoi fshehurazi në shtëpi, ndërsa prindërit e saj ishin jashtë. “Mësuesi më tërhoqi në krahë dhe më puthi”, thotë ajo, duke shtuar se nëna dhe babai i saj i kapën në makinën e tij kur u kthyen në shtëpi.
Ai nuk e pranoi atë që kishin bërë, madje e fajësoi atë për puthjen e tyre. Sipas Hiltonit, ai i tha asaj para tyre me një ton të ndezur: “Pse më detyrove ta bëj këtë?”
Atë verë, prindërit e dërguan të jetonte me gjyshen në Francë. Për shumë vite, ajo vetë nuk mund ta pranonte atë që kishte ndodhur dhe as që mësuesi i saj ishte në fakt… pedofil.
