Gjatë ditës së sotme në shtëpinë e “BBV” erdhi një zarf i zi, vendimi i të cilit u komunikua disa minuta më parë gjatë emisionit.
“Ky është një komunikim zyrtar nga “Big Brother”. Nuk do të lejohet që asnjë të thyejë rregullat duke thënë “në kuadër të lojës”. Kjo lojë nuk luhet kështu. Kjo lojë luhet duke respektuar të drejtat dhe liritë e secilit pa cënuar askënd. Nëse ndonjë prej jush lejon që këto rregulla të shkelen ose nuk reagon duke justifikuar është gjithsesi përgjegjësi e “BB” të mos e lejojë këtë gjë. Ky është një ultimatum final. Në momentin e parë që ndonjëri prej jush do të thyejë rregullat e mësipërme, konkurrenti do të eliminohet menjëherë. Dhe ky është paralajmërimi i fundit nga “BB”,”-shkruhej në zarf.
Po çfarë ndodhi më herët midis Kiarës dhe Luizit?
Një mision i vendosur nga “Vëllai i Madh” për vajzat e shtëpisë, krijoi kaos, solli lot, debate dhe një situatë të vështirë për Kiara Titon. Ermiona iu komunikoi vajzave të tjera se “Big Brother” iu ka dhënë një mision, ku duhet të injorojnë djemtë e shtëpisë, të mos flasin me ta, të mos reagojnë dhe të mos i prekin. Kështu vajzat do të fitonin një avantazh.
Luizi, i cili e kuptoi që në fillim lojën nga reagimet e Kiarës, ishte ai që u mundua të bëjë partneren e tij të dorëzohet për të humbur lojën.
Megjithëse fillimisht i tha Kristi se “gratë tona janë në lojë dhe mund të kenë një avantazh”, ai e çoi Kiarën deri në atë pikë sa ajo të përlotej dhe të kërkonte ndihmë nga Olta.
Luizi e zuri “ngushtë” në një cep, Kiarën në tualet, duke mos e lënë të lirë, deri në momentin që do i fliste dhe do të humbte lojën dhe avantazhin që vajzat do të merrnin. Duke qarë dhe duke thënë, “Olta dua të dal, nuk mundem, po më merret fryma, nuk është normale. Të lutem Olta më ndihmo”, Kiara u përpoq t’i shpëtonte Luizit dhe Armaldos, të cilët nuk hoqën dorë nga presioni që po i bënin Kiarës, duke injoruar tërësisht gjendjen e saj. Pas kësaj, Kiara doli e përlotur jashtë, duke ia treguar edhe një herë Luizit gjendjen e saj të rënduar.
