Policia e Tiranës ka marrë në pyetje shoqen e Joy Aoko-s, Emili Mutua. E reja nga Kenia është marrë në pyetje ditën e sotme, si person që mund të ketë dijeni për rrethanat e ngjarjes së vdekjes së Joy-t. Raportohet se edhe sot Emili i ka qëndruar versionit që ka deklaruar më herët, duke ngritur dyshime për shoferin e kazinos ku punonte Joy, Rodi Barçi.
Emili ka pohuar se Joy i ka treguar asaj shantazhet që shoferi i kishte bërë kohët e fundit për të vijuar lidhjen me njëri-tjetrin. Emili ka theksuar se ka dyshime që në ngjarje të jetë i përfshirë Barçi dhe persona të tjerë, por pa folur me persona specifik.
Ndërsa për shantazhet e Joy-t ajo tregon se është vënë në dijeni pak ditë para se të ndodhte ngjarja në gusht 2022.
Shoferi i kazinosë ku punonte 22-vjeçarja nga Kenia Joy Aoko u mor në pyetje dy ditë më parë për disa orë në lidhje me dyshimet e hetuesve se mund të ketë gisht në rrahjen dhe dhunimin e të resë. 32-vjeçari, Rodi Barci, deklaroi se ka qenë i lidhur me Joy-n, por në momentin kur ka ndodhur ngjarja, kanë qenë të ndarë dhe nuk kishin më lidhje me njëri tjetrin.
