Tërmetet e 6 shkurtit, prej 7.8 dhe 7.5 ballësh kanë marrë jetën e 44.218 personave në Turqi, sipas agjencisë shtetërore të lajmeve, Anadolu.
Ndërsa në Sirinë fqinje, numri i viktimave deri më tani është 5.900.
Që prej tërmeteve të 6 shkurtit, sipas agjencisë turke të fatkeqësive natyrore, janë regjistruar mbi 9.000 pasgoditje. Pothuajse 530.000 persona janë evakuuar vetëm nga zonat e prekura nga tërmetet në Turqi.
Turqia më 24 shkurt po ashtu bëri të ditur se ka nisur punën fillestare për rindërtimin e shtëpive të shkatërruara nga tërmetet, teksa Programi për Zhvillim i Kombeve të Bashkuara (UNDP), vlerësoi se 1.5 milion persona kanë mbetur të pastrehë.
Mbi 160.000 ndërtesa me 520.000 apartamente janë shembur ose janë dëmtuar rëndë nga tërmetet shkatërruese.
Kujtojmë që për t’i ardhur në ndihmë të prekurve nga tërmeti, Shqipëria ka dhuruar 1 milionë euro.
Kryeministri Edi Rama gjatë fushatës sensibilizuese “Turqia një zemër” shprehu ngushëllimet për jetët e humbura nga tërmeti tragjik, njoftoi se Shqipëria dhuron 1 milionë euro për të prekurit nga tërmeti në Turqi.
“Ne dërguam ekipet tona të ndihmës për të ndihmuar sa të mundëm. Ne e dimë se jemi një vend i vogël. Nuk kemi harruar atë që Turqia dhe Presidenti Rexhep Tajip Erdogan bëri për ne në tërmetin e 2019. Ne bëmë maksimumin për të mbështetur popullin turk.” Jemi gati ta bëjmë. Falë përpjekjeve fantastike të Turqisë, jam i sigurt se gjithçka do të jetë e suksesshme,” tha Rama.
