Një vit më parë, ende pa zbardhur drita, Presidenti rus Vladimir Putin nisi atë që e cilësoi si “operacion special ushtarak”, duke dërguar ushtrinë e tij për të pushtuar Ukrainën.
Sot, një vit pasi një luftë e përgjakshme nisi, ajo që ka mbetur janë qindra-mijëra të vdekur e të plagosur dhe miliona njerëz pa shtëpi e të larguar nga vendi i tyre.
Ndërsa konflikti që tronditi botën shënon përvjetorin e tij të parë, pasojat nukl janë ndjerë vetëm në Ukrainën e shkatërruar, por në të gjithë botën.
Që prej vitit të kaluar, konflikti përshkallëzoi krizën globale të ushqimit dhe qeveria e Ukrainës shpalli një ndalim të një game të gjerë të eksporteve bujqësore. Çmimet botërore të ushqimeve arritën rekord në mars të vitit 2022.
Në shtator të po atij viti, çmimet evropiane të gazit u rritën deri në 30% pasi Rusia tha se një nga tubacionet kryesore të furnizimit me gaz në Evropë do të mbetej i mbyllur për një kohë të pacaktuar.
Në nisje të vitit 2023, Organizata e Ushqimit dhe Bujqësisë, tha se indeksi i saj i çmimeve të ushqimeve arriti një rekord të lartë në vitin 2022, me 14.3% më shumë nga viti 2021. Banka Botërore paralajmëroi gjithashtu se ekonomia globale mund të shkojë në recesion në vitin 2023.
Në përvjetorin e parë të liftës, mesazhi i parë erdhi nga Presidenti ukrainas Volodymyr Zelensky, i cili tha me bindje se ky do të jetë viti i fitores.
“Më 24 shkurt, miliona prej nesh bëmë një zgjedhje. Jo flamuri i bardhë, por ai verdheblu. Jo duke ikur, por duke u përballur. Duke rezistuar dhe luftuar. Ka qenë një vit dhimbjeje, trishtimi, besimi dhe bashkimi. E dimë që viti 2023 do të jetë viti i fitores sonë”, shkroi ai në “Twitter.”
Si pasojë e konfliktit njëvjeçar, pjesë të mëdha të Ukrainës janë shkatërruar dhe sipas burimeve perëndimore, deri më tani 150.000 persona kanë vdekur nga të dyja palët.
