Vetëm pak orë e ndajnë nga një prej momenteve më të veçanta në jetën e saj. Elia Zaharia ka rrëfyer për “Madame Mapo”, emocionet e dasmës me Princin Leka. Ajo shprehet se me dasmën që do të zhvillohet të shtunën, do të realizohet ëndrra e saj dhe e Princit, i cili do të bashkojë për herë të parë në vendin e tij të gjithë pjesëtarët e familjes e kushërinjtë që jetojnë në mbarë botën.
Duke qenë një prej dasmave që do të jetë në fokusin e mediave kombëtare dhe atyre ndërkombëtare, Elia u shpreh se po mundohet që t’i japë ceremonisë një karakter kombëtar dhe në shërbim të promovimit të vendit.
“Sot, për ne të dy, është një emocion i madh, por gjithashtu edhe një përgjegjësi e madhe. Emocion pasi po realizojmë ëndrrën tonë, ashtu si çdo çift që shkon në altar. Për më tepër, për Princin është një emocion i madh pasi bashkon për herë të parë në vendin e tij të gjithë pjesëtarët e familjes e kushërinjtë që jetojnë në mbarë botën. Përveç këtij emocioni personal, për ne është një përgjegjësi akoma edhe më e madhe, pasi kjo dasmë do të jetë në vëmendjen mediatike kombëtare, si edhe ndërkombëtare. Për këtë arsye po mundohemi t’i japim një karakter sa më kombëtar, gjithëpërfshirës, në mënyrë që vendi ynë të paraqitet sa më mirë. Të ftuarit në dasmën tonë gjithashtu janë një vlerë e shtuar e këtij momenti të veçantë, jo vetëm për ne si familje, por për të gjithë shqiptaret. Ne të dy jemi të dedikuar ta vëmë dasmën tonë në shërbim të promovimi të vendit, duke promovuar Pallatin Mbretëror i njohur si Pallati i Brigadave, artin dhe muzikën, folklorin, kostumet tradicionale, kulinarinë, pijet vendase, etj. Çdo gjë, dëshirojmë te jetë pasqyrim i vlerave dhe kulturës sonë”.
E pyetur për familjen mbretërore, Elia shprehet se ka dëgjuar për të nga gjyshja e saj, e cila e adhuronte Mbretëreshën Geraldinë:
“Unë kam dëgjuar për Familjen Mbretërore nga gjyshja ime. Ajo e adhuronte Mbretëreshën Geraldinë. Mbaj mend kur një ekip televiziv nga Shqipëria shkoi në Afrikë të Jugut dhe sollën pamje të Familjes Mbretërore. Ne e ndoqëm atë program familjarisht. Gjyshes sime të ndjerë, Nënës Hava, iu mbushën sytë plot kur pa Geraldinën. “O Zot sa e bukur është, edhe sot! ” tha. Familja ime nga ana e mamasë kanë qenë mbështetës të mbretërisë dhe në familje flisnin lirshëm për vlerat e asaj periudhe. Por kuptohet, në vitet e diktaturës, me zë të ulët…
Fotografi të asaj dasme pak kam parë më përpara dhe shumë këto vite pranë Princit. Unë jam e pasionuar ndaj arkivit të fotove, ndaj edhe kam punuar shumë në albumet e vjetra. Kanë padyshim një magji ato foto, një sharm të jashtëzakonshëm…”.
Burimi: Madame Mapo
