Jemi mësuar të dëgjojmë dhe kemi besuar që Babagjyshi i Krishtlindjeve vjen në shtëpitë tona nga oxhaku.
Në prag të festës së Krishtlindjes kjo ishte përralla më e bukur që donim të dëgjonim.
Mirëpo në Lezhë gjatë ditës së sotme jo vetëm që ka shkuar Babagjyshi, por ka shëtitur në të gjithë qytetin për të shpërndarë dhurata.
Me një slitë të tërhequr nga kuajtë, Ilir Marvukaj së bashku me një tjetër qytetar të Lezhës kanë ndërmarrë këtë nismë për të gëzuar sadopak fëmijët e qytetit në këtë natë Krishtlindjesh.
I veshur si Babagjysh, Iliri u shpreh për “Report Tv” se fëmijët u gëzuan shumë kur e panë në qytet, ndërsa nuk harroi të bënte edhe një urim pë këtë festë.
“Se këto janë festa më të bukura dhe i uroj shqiptarë gëzuar Kritshlindjet, po presim fëmijët që të bëjmë foto dhe të marrin dhuratat. Kemi një orë që kemi lëvizur përgjatë qytetit, njerëzit janë gëzuar shumë, është hera e parë që bëhet në qytetin e Lezhës”, tregoi ai.
“Gëzuar, mbarësi dhe vit sa më i mirë për të gjithë shqiptarët”, përfundoi Babagjyshi.
Më pas, karroca e babagjyshit u ndal në sheshin “Gjergj Kastrioti”, ku të shumtë ishin fëmijët të cilët morën dhurata dhe iu gëzuan festës.
