Sokol Halili, i cili ekzekutoi me 3 plumba ish-bashkëshorten e tij 9 muajshe shtatzënë ka vrarë veten.
Mësohet se ngjarja ka ndodhur pasi policia zbuloi vendndodhjen e tij dhe po bënte negociata që të vetëdorëzohej.
“Pas një pune intenzive të të gjitha njësiteve të Policisë së Kosovës është arritur që të lokalizohet vendndodhja e vrasësit Sokol Halili. Përkundër tentativës së zyrtarëve policor që të negociojnë dorëzimin, dorasi vret veten.
Policia e Kosovës si dhe Inspektoriati Policor i Kosovës do të vazhdojnë hetimet për zbulimin e të gjitha rrethanave të vrasjes së gruas shtatëzënë dhe vetëvrasjes së dorasit”, njoftoi Ministri i Punëve të Brendshme, Xhelal Sveçla, në një postim në Facebook.
Krimi i rëndë ndodhi mbrëmjen e së mërkurës (30 nëntor), rreth orës 18:00 në oborrin e maternitetit.
Hamide Magashi kishte planifikuar të sillte në jetë fëmijën të nesërmen, por ish-bashkëshorti i mori jetën asaj dhe foshnjës së palindur.
35-vjeçarja ishte ndarë nga Halili vetëm 3 muaj pas martesës, për shkak të dhunës së vazhdueshme që ai ushtronte. Një ditë më parë, motra e viktimës rrëfeu se ishin detyruar të kërkonin edhe ndihmën e policisë për ta hequr nga duart e tij 35-vjeçaren.
Sipas Burbuqe Brahimit, motrës së viktimës, kërcënimet kishin vazhduar edhe pas ndarjes. Madje ai kishte kërcënuar se do të vrasë atë, motrën e saj të vogël dhe dhëndrin me të cilët jetonte Hamidja.
Ndonëse kishte urdhër-mbrojtje për 35-vjeçaren, ajo u vra në oborrin e QKUK-së. Ministrja e Drejtësisë së Kosovës ka paralajmëruar shkarkime sapo të vërtetohet dështimi në hallkat institucionale.
