Futbollisti Cristiano Ronaldo ka reaguar pas zyrtarizimit të largimit të tij nga ekipi i Manchester United.
Me anë të një statusi në rrjetet sociale ai shprehet se ka ardhur koha për një sfidë të re. Më tej ai i uron suksese ekipit për pjesën e mbetur të sezonit.
“Pas bisedave me Manchester United, ne kemi rënë dakord reciprokisht për të ndërprerë kontratën tonë para kohe.
Unë e dua Manchester United dhe i dua tifozët, kjo nuk do të ndryshojë kurrë. Megjithatë, duket koha e duhur për të kërkuar një sfidë të re. I uroj skuadrës suksese për pjesën tjetër të sezonit dhe për të ardhmen”, shkruan ai.
Manchester United ka zyrtarizuar sot ndërprerjen e marrëveshjes me futbollistin portugez, si pasojë e deklaratave bombastike që dha pak ditë më parë ku akuzoi klubin e trajnerin për paaftësi.
Deklarata zyrtare e Manchester United:
Cristiano Ronaldo do të largohet nga Manchester United me marrëveshje të përbashkët, me efekt të menjëhershëm.
Klubi e falënderon për kontributin e tij të jashtëzakonshëm në dy periudha në Old Trafford, duke shënuar 145 gola në 346 paraqitje.
Të gjithë në Manchester United mbeten të përqendruar në vazhdimin e përparimit të ekipit nën drejtimin e Erik ten Hag dhe të punojnë së bashku për të dhënë sukses në fushë.
Kujtojmë se intervista “bombë” e Ronaldos, e publikuar së fundmi nxorri në shesh shumë të vërteta, të paktën sipas portugezit, që u shpreh se shumë persona kërkuan ta largonin nga klubi dhe jo vetëm trajneri, për të cilin theksoi se nuk ka respekt. Fjalë të rënda për një klub si United që tashmë ka marrë edhe vendimin përfundimtar mbi sulmuesin portugez.
Tashmë mbetet të shihet se ku do ta shohë e ardhmja sulmuesin portugez, i cili po bëhet gati që të luajë në Botëror me përfaqësuesen e vendit të tij pa pasur zyrtarisht një skuadër. Ai deklaroi në intervistën e tij për Pierce Morgan se nëse do të fitonte Botërorin, do të tërhiqej menjëherë nga futbolli. Përndryshe, mendonte të vazhdonte deri në moshën 40-vjeçare.
