Botërori i Katarit 2022 duket se premton surpriza të mëdha dhe një të tillë e pamë në ndeshjen e vlefshme për Botërorin mes Shteteve të Bashkuara të Amerikës dhe Wales.
Në minutën e 36-të USA kaloi në avantazh me një super gol të Timothy Weah.
Deri këtu nuk ka asgjë të jashtëzakonshme! Mirëpo nëse ju themi se Weah është djali i parë i një kreu shteti që luan në një kompeticion të tillë madje edhe që shënon, atëherë gjëja merr kuptim.
Golshënuesi në fjalë është djali i Presidentit aktual të Liberisë, George Weah. Siç duket 22-vjeçari talentin e ka të trashëguar nga i ati, pasi edhe George ka qenë një nga futbollistët më të mirë të kohës së tij.
Karriera e tij është mbyllur gati 20 vite më parë, ndaj për ju që nuk e njihni këtë legjendë të futbollit, po iu “servirim” pak nga vitet e lavdisë se tij.
George Tawlon Manneh Oppong Ousman Weah është një ish-futbollist profesionist i cili po shërben si president i Liberisë, në detyrë që nga viti 2018.
Më herët ai luajti si sulmues në karrierën e tij të lavdishme 18-vjeçare të futbollit, e cila përfundoi në 2003. Një fakt interesant është që Weah është i pari ish-futbollist profesionist afrikan që u bë kryetar shteti.
Pasi filloi karrierën në Liberinë e tij të lindjes, Weah kaloi 14 vite duke luajtur për klube në Francë, Itali dhe Angli.
Arsène Wenger e solli për herë të parë në Evropë, duke e nënshkruar atë për “Monacon” në 1988. Weah u transferua te “Paris Saint-Germain” në 1992 ku fitoi “Ligue 1” në 1994 dhe u bë golashënuesi më i mirë i “UEFA Champions League” 1994-95.
Ai nënshkroi për Milan-in në 1995 ku kaloi katër sezone të suksesshme, duke fituar “Serie A” dy herë.
George u transferua në “Premier League” në fund të karrierës së tij dhe pati periudha te “Chelsea” dhe “Manchester City”, duke fituar “Kupën FA” me të parën, përpara se të kthehej në Francë për të luajtur për “Marseille” në 2001.
Ish-futbollisti legjendar e përfundoi karrierën e tij me “Al Jazira” në 2003.
Në shpinën e këtij futbollisti legjendar “peshojnë” edhe dy çmime shumë të rëndësishme. Ai i vitit të largët 1995, ku George u emërua “Lojtari Botëror i Vitit” nga FIFA dhe fitoi “Topin e Artë” dhe ai i një viti më vonë ku u shpall “Lojtari Afrikan i Shekullit”.
“Pengu” i karrierës së Weah është se në gjithë këto vite nuk e fitoi kurrë “Ligën e Kampionëve” të UEFA-s.
I riu Timothy Weah sot po jeton ëndrrën e babit të tij pasi ai nuk ka mundur kurrë të luaj në “Kupën e Botës”.
