Gianni Infantino do të vazhdojë të mbretërojë i qetë në fronin e presidentit të FIFA-s, si numri 1 i futbollit botëror. Përkundër asaj që mendohej, askush nuk ka guxuar të kandidojë kundër italo-zviceranit në zgjedhjet e marsit 2023 ku do të rikonfirmohet në postin e tij.
Pavarësisht përplasjeve të vazhdueshme që ai kishte me presidentin e UEFA-s, Aleksander Ceferin, thuajse të gjitha vendet europiane kanë mbështetur Infantinon në kandidaturën e tij dhe mediat ndërkombëtare kanë zbuluar se ai ka marrë 200 nga 209 votat e mbështetjes së anëtarëve për rizgjedhjen si president teksa ka prezantuar kandidaturën e tij. Mbështetja e vendeve europiane ka qenë nga 52 të tilla dhe kjo tregon edhe një herë se përtej polemikave, Infantino mbetet një emër i dashur për drejtuesit e federatave të kontinentit tonë, ndonëse akuzohet vazhdimisht për korrupsion apo përdorim fondesh për qëllime personale.
Kështu, Infantino thjesht do të paraqitet në sallë në Kigali të Ruandës në Kongresin që zhvillohet më 16 mars 2023, për të marrë me duartrokitje nga të pranishmit mandatin e radhës si president i FIFA-s. Kjo do t’i japë mundësinë që të jetë presidenti i parë i cili do të drejtojë në një periudhë kur Kupa e Botës do të zmadhohet në një turne final me 48 ekipe, në vitin 2026 kur të organizohet në SHBA, Meksikë dhe Kanada. Vendimi për zgjerimin e numrit të pjesëmarrësve u mor në janar 2017, pak kohë pasi Infantino u zgjodh në krye të FIFA-s.