Ermal Fejzullahu është një nga “kollozët” e skenës shqiptare. Në gati 20 vite karrierë ai i ka dhuruar publikut shqiptarë një sërë hitesh, që edhe sot këndohen me zë të lartë.
Si rrallëherë së fundmi, këngëtari ka realizuar një intervistë për “Natën me Aulonën”, ku ka rrëfyer disa momente të rëndësishme nga jeta e saj personale dhe profesionale.
Një artist me kaq shumë vite karrierë mbi supe, me siguri ka hasur edhe vështirësi të shumta gjatë rrugëtimit të tij. Teksa po tregonte pikërisht mbi momentet sfiduese, ai rrëfeu edhe luftën me ankthin.
Ndonëse tashmë ajo situatë e vështirë ka kaluar dhe ai është në gjendje t’i menaxhojë emocionet e tij, Ermali nuk e pati fare problem të pranonte se në fillim i është nevojitur ndihma e psikologut.
“Nuk është e lehtë asgjë. Njerëzit shohin këtë ditë ku je, por askush nuk i llogaritë këto 19 vite sa vështirësi ka pasur që të arrish të jesh një artist i rregullt dhe me pas peshë në punën që bën. Ka pasur momente shumë të vështira, po unë nisem me atë që njeriu është i bërë për sfida. Edhe sa më shumë momente të vështira, të bëjnë më të fortë dhe më të përgjegjshëm. Dhe je më i suksesshëm. Në një kohë kam pasur një ngarkesë psikologjike, më është krijuar një lloj ankthi. “Çrregullim paniku”, ma kanë konstatuar më pas.
Kam qenë tek psikologu, psikologu është për njërzit. Në fillim nuk kam ditur çfarë problemi kam. Kam menduar se kam probleme me mushkëritë. Më dukej sikur më merrej fryma,”-është shprehur këngëtari.
Kujtojmë që përpos karrierës, Ermali ka edhe një familje të shëndoshë, ku është babai i katër fëmijëve. I pyetur nga moderatorja nëse ka në plan ta zgjerojë më tej familjen ai u shpreh:
“Nuk e kemi në plan të kemi fëmijë të tjerë për momentin, pastaj jetës nuk i dihet.”
