Ngjarja skandaloze ku infermieret dhunojnë një paciente të moshuar në një qendër mjekësore në qytetin e Pejës, ka tronditur mbarë opinionin publik.
Videoja prej pasditës së 2 nëntor-it është bërë virale kudo në rrjet, duke nxitur reagime të ashpra. Të shumtë kanë qenë edhe personazhet e njohur që kanë reaguar.
Mirëpo përpos atyre shqiptar, së fundmi ka thënë fjalën e saj në lidhje me ngjarjen e rëndë edhe aktorja e njohur spanjolle, Clara Galle.
Aktorja ka ndarë në Instagramin e saj ku ndiqet nga më shumë se 3 milion persona një postim me disa foto të të moshuarës së dhunuar. Si mbishkrim të story-t të saj Clara shkruan: “Kjo është bota në të cilën duam të jetojmë?”
Kujtojmë që mbrëmjen e djeshme Gjykata e Pejës mori vendimin për tre infermieret që dhunuan të moshuarën në qendrën “Orenda”. Të pandehurave iu është caktuar masa e paraburgimit në kohëzgjatje prej tridhjetë (30) ditësh.
Sipas komunikatës së Gjykatës në Pejë, ekziston dyshimi se të pandehurat e kanë kryer veprën penale për të cilën akuzohen, ndërsa ky dyshim mbështetet në provat që janë dorëzuar nga prokuroria. Sipas Gjykatës, me gjetjen e mundshme të pandehurave në liri ekziston rreziku i ndikimit në dëshmitarë të cilët janë pjesë e stafit të shtëpisë së kujdesit shëndetësor ku ka ndodhur vepra penale e të cilët nuk janë identifikuar ende, si dhe ndikimit në deklaratën e të dëmtuarës pasi ajo është në gjendje të rënduar shëndetësore dhe nuk ka deklaruar ende.
