Një veprim i zakonshëm që shumica e qytetarëve e bëjnë pas tërheqjes së parave në bankomat mund të kthehet në një rrezik të fshehur për sigurinë financiare.
Ekspertët e sigurisë kibernetike paralajmërojnë se printimi dhe më pas hedhja e faturës së transaksionit pa kujdes mund të ekspozojë informacione personale që mund të shfrytëzohen nga persona keqdashës.
Sipas specialistëve, faturat e bankomatëve shpesh përmbajnë të dhëna të ndjeshme si katër shifrat e fundit të kartës, kohën e saktë të transaksionit, shumën e tërhequr dhe në disa raste edhe informacion mbi gjendjen e llogarisë. Edhe pse këto të dhëna duken të pjesshme, në duart e gabuara ato mund të përdoren për tentativa mashtrimi ose për ndërtimin e profileve financiare të individëve.
Ekspertët theksojnë se, ndonëse vetëm një faturë nuk është e mjaftueshme për të hyrë në një llogari bankare, kombinimi i saj me informacione të tjera të mbledhura në mënyra të ndryshme mund të rrisë ndjeshëm rrezikun e vjedhjes së identitetit apo skemave mashtruese.
Për të shmangur këto rreziqe, rekomandohet përdorimi i opsionit “pa printim fature” që ofrojnë shumica e bankomateve moderne, si dhe përdorimi i aplikacioneve bankare ku transaksionet shfaqen në mënyrë dixhitale dhe të sigurt.
Në rast se fatura merret, këshillohet që ajo të ruhet me kujdes ose të griset përpara se të hidhet. Po ashtu, ekspertët sugjerojnë aktivizimin e njoftimeve në telefon për çdo veprim bankar dhe kontrollin e rregullt të llogarisë, si hapa shtesë për mbrojtjen e financave personale në epokën dixhital
