Gjykata e Pejës ka marrë vendimin për tre infermieret që dhunuan të moshuarën në qendrën “Orenda”. Të pandehurave iu është caktuar masa e paraburgimit në kohëzgjatje prej tridhjetë (30) ditësh.
Sipas komunikatës së Gjykatës në Pejë, ekziston dyshimi se të pandehurat e kanë kryer veprën penale për të cilën akuzohen, ndërsa ky dyshim mbështetet në provat që janë dorëzuar nga prokuroria. Sipas Gjykatës, me gjetjen e mundshme të pandehurave në liri ekziston rreziku i ndikimit në dëshmitarë të cilët janë pjesë e stafit të shtëpisë së kujdesit shëndetësor ku ka ndodhur vepra penale e të cilët nuk janë identifikuar ende, si dhe ndikimit në deklaratën e të dëmtuarës pasi ajo është në gjendje të rënduar shëndetësore dhe nuk ka deklaruar ende.
Gjithashtu, gjykata ka vlerësuar se me lënien e të pandehurave në liri ekziston rreziku i përsëritjes së veprës penale apo i kryerjes së ndonjë vepre të re penale, duke marrë parasysh mënyrën dhe rrethanat në të cilën është kryer vepra penale për të cilën akuzohen, shkallën e lartë të pjesëmarrjes së të pandehurave, si dhe faktin se në mediat e vendit qarkullon edhe lajmi se dëshmitarja e cila ka shpërndarë videon me përmbajtje të veprimeve të të pandehurave ka pranuar mesazhe kërcënuese, që në këtë fazë dyshohet se janë dërguar nga të pandehurat ose personat e shtyrë nga to.
