Britania e Madhe ndodhet në zi prej ditësh, pasi ndërroi jetë Mbretëresha Elizabeth II.
Ndarja nga jeta e monarkes së vendit do të shoqërohet me një sërë ndryshimesh më pas duke nisur nga paratë, pullat postare deri tek pasaportat.
Por, jo vetëm kaq, rasti i Princ Harry-t së fundi, dëshmoi se pavarësisht protokolleve të rrepta lidhjet familjare janë më të forta.
Gjatë nderimeve të ditës së sotme të Mbretëreshës Elizabeth II, Duka i Sussex-it është lejuar të veshë si pjesa tjetër e nipave të monarkes britanike uniformën ushtarake.
Kjo ishte diçka e pamundur për Harry-n deri tani pasi ai vendosi të heq dorë nga çdo detyrë mbretërore kur shkoi të jetonte në Shtetet e Bashkuara të Amerikës me gruan e tij, Meghan Markle.
Ky përjashtim ditën e sotme bëhet me dije se është lejuar nga vetë Mbreti Charles III.
Duke nisur nga fëmijët e Princeshës Anne, vajzat e Princit Andrew dhe të vegjlit e Princit Edward, me në krye Princ William dhe Harry-n kanë qëndruar për orë të tëra pranë arkivolit të Mbretëreshës.
Kujtojmë që monarkja e ndjerë, vdiq më 8 shtator 2022 në moshën 96-vjeçare.
Në fron si trashëgimtari i saj u vendos Charles III. Ndonëse, ditën kur Mbretëresha u nda nga jeta Harry arriti me vonesë, këto ditë zie së bashku me Meghan Markle ata kanë qëndruar në Londër.
Dyshja janë prindër të dy fëmijëve, Archie-t dhe të voglës Lilibet.
