Këngëtari italian, Alessandro Mahmood i njohur me emrin e skenës si Mahmood ka mbërritur ditën e sotme në Prishtinë. Ai do të jetë një nga artistët që do performojë sonte në festivalin ndërkombëtar të muzikës Sunny Hill.
Ai është shfaqur së bashku me ambasadorin italian në Kosovë, Antonello De Riu në një konferencë për median, para nisjes së natës së dytë të festivalit.
Këngëtari tha se është i lumtur që vjen për herë të parë në Kosovë. Mahmood shtoi se shpreson që përformanca e tij të shkojë mirë dhe tha se ka dëgjuar për Kosovën edhe përpara festivalit
“Është një mundësi e mirë e imja që të jem në këtë festival i cili ka karakter ndërkombëtar… Jam i lumtur që do të përformoj këtu, kështu që përmes kësaj pjesëmarrje paraqes muzikën time. Shpresoj që çdo gjë të shkojë mirë. Kam dëgjuar edhe më parë për Kosovën”, tha ai.
Këngëtari italian ka vazhduar më tej, pasi ka folur edhe për pritshmërinë e tij gjatë performancës së sotme.
“Shpresoj, jam pak në ankth që unë do këndoj edhe ata do të rrinë e dëgjojnë”, është shprehur Mahmood.
Mahmood e mbylli konferencën në mënyrën më të mirë të mundshme. Ai ka thënë fjalët në gjuhën shqipe, “Faleminderit Prishtinë, ju dua”.
