Jemi tashmë në sezonin e verës apo thënë ndryshe në sezonin e bashkëpunimeve. Teksa të gjithë presin verën për të shijuar pushimet për këngëtarët është e kundërta, madje është sezonin më i ngarkuar. Shumica e artistëve sjellin këngët e tyre më ritmike për t’ju përshtatur gjallërisë dhe për të patur sa më shumë ftesa nëpër koncerte.
Por vitet e fundit e sidomos këtë sezon kemi vënë re rritje të bashkëpunimeve mes artistëve. Teksa të gjithë do donim të shikonim këngëtarët tonë të preferuar në të njëjtën këngë, kjo tashmë është bërë paksa përsëritëse. Shtojmë këtu dhe meloditë repetitive dhe tekset jo aq cilësore, lind vetvetiu pyetja, a është kthyer muzika në biznes?
Nëse e krahasojmë me artistët ndërkombëtarë, ata kanë një album me 13 këngë dhe mes tyre vetëm 1 ose 2 do jenë bashkëpunime. Por pastaj kujtojmë se janë shumë pak artistët në vendin tonë që sjellin albume, i cili është një nga elementët më të rëndësishëm të karrierës së tyre.
Ka qenë këngëtari Alban Skënderaj, i cili gjatë një podcasti, ceku mungesën e madhe të muzikës në ditët e sotme. Sipas tij kryesisht muzika po bëhet për clube ndaj edhe tregu është mbushur me të rinj, mirëpo një pjesë e shoqërisë pret t’i ofrohet diçka tjetër.
Iconstyle.al
