Imagjinoni që “Alexa” juaj të nisë të flasë papritur si i afërmi juaj i vdekur. A do t’ju bënte të lumtur, apo tingëllon si e frikshme? Është padyshim subjektive, por githsesi duket se ky opsion i ri do të ndezë shumë debate.
Gjithsesi, Amazon kohët e fundit u “mburr” me aftësinë e Alexa për të imituar zërin e një të afërmi të vdekur. Karakteristika u prezantua në konferencën e “Amazon re:Mars” në Las Vegas nga Rohit Prasad, Zëvendës/Shkencëtar i Lartë për ekipin Alexa.
Në skenë, Prasad tha se ndërsa opsioni i ri nuk mund të eliminojë dhimbjen e humbjes së njerëzve të dashur, “Ajo definitivisht mund t’i bëjë kujtimet e tyre të qëndrueshme”.
Më pas u shfaq një video ku një fëmijë pyet Alexa-n: “A mund të nisë gjyshja të më lexojë Magjistarin e Ozit?” Pasi ajo thotë, “në rregull”, Alexa vazhdon të flasë me zërin e gjyshes së fëmijës.
“Siç e patë në këtë përvojë, në vend të zërit të Alexa-s që lexon librin, është zëri i gjyshes së fëmijës,” u tha të pranishmëve Rohit Prasad.
Amazon ka zhvilluar tashmë teknologjinë e sintetizimit të zërit për të lejuar Alexa-n të imitojë zërat e të famshëmve, duke përfshirë Shaquille O’Neal dhe Melissa McCarthy.
Por kjo ka kërkuar më parë që një individ të regjistrojë dhjetëra orë audio. Amazon tani ka zhvilluar një mënyrë për të riprodhuar një zë në cilësi të lartë duke përdorur më pak se një minutë fjalim të regjistruar, të cilin inxhinierët e kompanisë ishin në gjendje ta bënin “duke e inkuadruar problemin si një detyrë të konvertimit të zërit, dhe jo një detyrë të gjenerimit të të folurit”, sipas Prasad.
Në prezantimin e demonstrimit, Prasad tha se aftësia e Alexa për të imituar fjalimin e një të afërmi të vdekur mund të përfaqësojë një mënyrë për të ruajtur kujtimin e një të dashuri që ka vdekur.
“Ne padiskutim po jetojmë në epokën e artë të AI, ku ëndrrat tona dhe fantashkenca po bëhen realitet,” tha ai.
