Cristiano Ronaldo nuk po kalon një ditë të mirë pasi një nga makinat e tij është përplasur. Bëhet fjalë për një Bugatti Veyron që kushton 1.5 milionë euro me më shumë se 1000 kuaj fuqi.
Ngjarja ka ndodhur mëngjesin e sotëm në Palma de Mallorca, në lagjen Sa Coma, në Bunyola.
Makina sportive e Ronaldo-s u përplas në hyrje të një shtëpie fshati, në një zonë ku ndodheshin shishet e butanit, raporton “Diario de Mallorca”.
Sipas shtypit vendas, raportet fillestare, ende të pa konfirmuara, bëjnë me dije se ka qenë një punonjës i Cristiano Ronaldo-s që drejtonte makinën sportive në momentin e aksidentit dhe jo lojtari i Manchester United.
Nga aksidenti nuk ka mbetur i dëmtuar asnjë prej pjesëtarëve të familjes së Ronaldo-s pasi raportohet se ata janë me pushime në një ishull.
Mësohet se drejtuesi i mjetit nuk ka pësuar lëndime në këtë incident, megjithëse pjesa e përparme e “Bugatti Veyron” thuhet se është shkatërruar nga përplasja.
Aksidenti ka ndodhur rreth orës 11 të mëngjesit të sotëm edhe pse policia po heton ngjarjen por ende nuk ka bërë asnjë koment.
Cristiano nisi pushimet e tij për në Majorca me pesë fëmijët e tij dhe bashkëshorten Georgina Rodriguez më 14 qershor. Si duket dyshja po përpiqet të harrojë disi humbjen e djalit të tyre të porsalindur dhe po mundohen të shijojnë pushimet e tyre.
