Fakti që emri i këngëtares Bleona Qereti u shpall në listat e kandidatëve për Këshillin Kombëtar të Partisë Demokratike, nuk i pëlqeu aspak aktivistes Evi Kokalari.
Sipas Kokalarit, Bleona nuk është imazhi që partia kërkon të ndërtojë për prezantimin e vlerave të Kuvendit.
“Do doja të shikoja intelektualë dhe shkrimtarë e artistë si Inva Mula dhe Visar Zhiti, etj në këshill. Ose merreni PD në seriozisht ose mos na humbni kohën kot. Jam pa fjalë”!- tha ajo për Qeretin, mirëpo kjo e fundit duket se do të marrë “hak” për këto fjalë.
Avokati i Bleona Qeretit, Marc. E. Kasowitz i ka dërguar një letër Evi Kokalarit ku e paralajmëron të ndalë shpifjet në drejtim të klientes së tij.
Kasowitz shkruan se ndaj Bleona Qeretit janë bërë deklarata të shumta që sipas tij janë të rreme, keqdashëse dhe shpifëse.
Ai shton se këto deklarata kanë dëmtuar reputacionin e saj dhe profilin e biznesit. Avokati thekson se nëse nuk ndalen akuzat do të nisin një proces gjyqësor për të kërkuar dëmshpërblim.
Marc E. Kasowitz sipas mediave prestigjioze amerikane, njihet gjerësisht si një prej avokatëve të ish-Presidentit Donald Trump.
“Kam lindur në Shqipëri por jam një qytetare amerikane. Unë e dua Shqipërinë por besnikëria ime është ndaj Shteteve të Bashkuara të Amerikës, vendit tim! Nëse do të punoja ndonjëherë për një qeveri, do të punoja vetëm për qeverinë e Shteteve të Bashkuara të Amerikës!”
