Sipas studimeve të fundit, pilula kontraceptive mashkullore jo hormonale ka rezultuar 99% efektive në parandalimin e shtatzënisë tek minjtë. Ky mund të jetë një lajm shumë i mirë edhe për njerëzit! Ndaj për këtë arsye po planifikohen prova edhe tek njerëzit, ndonëse disa studiues janë skeptikë në lidhje me sigurinë e pilulës.
“Pavarësisht përpjekjeve të shumta për të bërë një kontraceptiv mashkullor efektiv dhe të sigurt, asnjë trajtim i deritanishëm nuk i ka kaluar provat klinike tek njerëzit. Shumica janë bazuar në hormone, por kontraceptivët jo hormonalë priren të kenë më pak efekte anësore”– u shpreh mjeku Abdullah al Noman në Universitetin e Minesotës në Minneapolis.
Mjeku së bashku me kolegët e tij u dhanë minjve meshkuj një dozë ditore të një molekule të quajtur YCT529 për një periudhë kohore katër javë dhe zbuluan se numri i tyre i spermatozoidëve të prodhuar ra ndjeshëm. Rreth 4-6 javë pasi minjve iu ndërprenë provat, ata mundën të riprodhoheshin normalisht përsëri pa efekte anësore të dukshme.
Hulumtimet e mëparshme kanë treguar se minjtë që ishin modifikuar gjenetikisht nuk kishin asnjë efekt anësor, përveç paaftësisë për të prodhuar spermë.
Noman dhe kolegët e tij tani kanë licencuar ilaçin e tyre në një kompani private në SHBA, e cila këtë vit synon të kryejë prova tek njerëzit.
