Presidenti ukrainas Volodymyr Zelensky tha të dielën se ai është “gati për negociata” me presidentin rus Vladimir Putin, por paralajmëroi se nëse ato dështojnë “kjo do të thotë se kjo është një luftë e tretë botërore”.
“Unë jam gati për negociata me të. Kam qenë gati për dy vitet e fundit. Dhe mendoj se pa negociata nuk mund t’i japim fund kësaj lufte,” i tha ai Fareed Zakaria të “CNN”.
“Unë mendoj se ne duhet të përdorim çdo format, çdo shans për të pasur një mundësi për të negociuar, mundësinë për të biseduar me Putinin. Por nëse këto përpjekje dështojnë, kjo do të thotë se kjo është fillimi i një luftë të tretë botërore,” shtoi ai.
Zelensky ka kërkuar më shumë negociata ditët e fundit ndërsa pushtimi rus i Ukrainës po i afrohet javës së katërt. Në një video-mesazh të postuar të shtunën, ai bëri thirrje për bisedime pa vonesë, duke paralajmëruar se përndryshe humbjet e Rusisë do të ishin të mëdha.
“Ne gjithmonë kemi insistuar për negociata. Gjithmonë kemi ofruar dialog, kemi ofruar zgjidhje për paqen,” tha ai. “Dhe dua që të gjithë të më dëgjojnë tani, veçanërisht në Moskë. Është koha për t’u takuar. Koha për të biseduar. Është koha për të rivendosur integritetin territorial dhe drejtësinë për Ukrainën.”
Zelensky ka thënë më parë se prioritetet e tij në bisedime janë të qarta: “Fundi i luftës, garancitë e sigurisë, sovraniteti, rivendosja e integritetit territorial, garanci reale për vendin tonë, mbrojtje reale për vendin tonë”.
Zelensky gjithashtu i tha Zakarias të dielën se nëse Ukraina “do të ishte anëtare e NATO-s, një luftë nuk do të kishte filluar”.
