Ngjarja të cilës i frikësohej e gjithë bota, tashmë ndodhi, Rusia ka nisur pushtimin e Ukrainës nga Donbasi duke shkaktuar tetë të vrarë dhe nëntë të plagosur deri më tani.
Shqiptarja e cila jeton në Ukrainë, Nelli Syupyur, përmes një videoje të publikuar në rrjete sociale ka rrëfyer momentet e tmerrit nga sulmi rus.
Ajo u shpreh se situata është shumë e rëndë dhe se nuk mund të dalësh dot nga Ukraina, pasi kufijtë janë bllokuar.
Nelli gjithashtu tha se në të gjithë Ukrainën ka plot shqiptarë, të cilët ashtu si ajo, duan të largohen në një vend tjetër.
“Unë jam këtu në Ukrainë, ishte situatë e rëndë, ka shumë njerëz në banka që marrin para, kufijtë janë të mbyllur, nuk mund të dalësh nga Ukraina. Burri im shkoi në luftë unë jam me djalin. Mund të më telefononi, më shkruani, shpresoj të ikim nga Ukraina, të largohemi. Duhet të shkojmë të hamë të flemë pak. Në të gjithë Ukrainën ka shqiptarë plot. Duam të largohemi në Shqipëri ose në një vend tjetër”, tha ajo.
Ministri i Jashtëm i Ukrainës, Dmytro Kuleba, tha këtë mëngjes se Rusia nisi pushtimin e vendit të tij.
Në një postim në Twitter, Kuleba shkroi se presidenti rus, Vladimir Putin ka nisur “pushtimin e Ukrainës në shkallë të plotë”.
Ai tha se Ukraina do ta mbrojë veten dhe se “bota mund dhe duhet ta ndalë Putinin”.
