Të përballesh me administrata që krijojnë rregulla dhe i thyejnë vetë duket një koncept paradoksal dhe i pazakonshëm, por në vendin tonë tashmë është realiteti normal.
Ditën e sotme, pas mbledhjes së Komitetit Teknik të Eksperteve, u bë një thirrje për qytetarët që të reagojnë menjëherë kur shohin njerëz pa maskë, duke i postuar me video përmes reagimit publik.
Një deklaratë e tillë sjell menjëherë në retrospektivë, e na çon pas në kohë në periudhën famkeqe të diktaturës, nga e cila nuk po shikojmë më ndonjë ndryshim.
Në një kohë që kemi dëgjuar si një të kaluar të largët nga prindërit fragmente kujtimesh nga “koha e Enverit” dhe “koha e spiunëve”, nuk e dinim që do të vinte momenti që këtë realitet, do ta preknim e përjetonim dhe ne.
Vetë “Iconstyle.al” ka bërë ankesa për shkelje si mosrespektimi i masave kundër grumbullimeve dhe normalizimi i mosvënies së maskës nga vetë administratat; në një kohë që reagimi i tyre tallës na përplaste në fytyrë foto aktivitetesh të publikuara nga ata në rrjete sociale, më krenarë së kurrë që i kanë dhënë prioritet eventeve, para jetës së njerëzve.
Ndërkohë, përgjigjet e dhëna janë kthyer në mbrojtje të tyre e nuk është marrë parasysh asnjë provë e dërguar. Mesa duket, “provat” e vetme që administrata merr parasysh, janë ato me tipare ‘diktatureske’ që na kthejnë 30 vite pas në kohë.
Në vendin tonë, çdo ditë e më shumë shikojmë se administratat japin shembull të gabuar dhe ndjekin sloganin e tyre të preferuar “Bëj si them unë, e mos bëj si bëj unë”.
